Danimarka millisinin və İtaliya "İnter"inin futbolçusu Kristian Eriksen topla məşqlərə başlayıb. 

29 yaşlı yarımmüdafiəçi ölkəsinin "Odense" klubunun gənclər komandasında hazırlıq keçir. 

 Klubdan bildirilib ki, təcrübəli oyunçunun müraciətindən sonra onun kollektivlə birlikdə məşq etməsinə icazə verilib: "Onun villası bazanın yaxınlığında yerləşir. Eriksen gənclik illərində "Odense"də çıxış edib. Ona məşq etmək imkanı yarada bildiyimiz üçün şadıq". 

 Qeyd edək ki, Kristian Eriksen iyunun 12-də Finlandiyaya qarşı AVRO-2020-nin B qrupunun ilk tur matçında huşunu itirərək, yerə yıxılıb. 15 dəqiqə ərzində təcili yardım göstərildikdən sonra onu xəstəxanaya apararaq, vəziyyətini sabitləşdiriblər. Daha sonra əməliyyat olunan danimarkalı oyunçunun ürəyinə kardioverter-defibrillyator cihazı quraşdırılıb. O, 2005 - 2009-cu illərdə "Odense"nin şərəfini qoruyub.